જંબુસર મંગણાદ ખેડૂત સીમર મુકેશભાઈ ભાઈલાલભાઈ તેમજ અન્ય 2 ખેડૂતો ઘ્વારા છેલ્લા 3 વર્ષ થી સેફ એનવીરો કંપની ના કેમિકલ યુક્ત પ્રદુષી પાણી થી ખેતી તેમજ પર્યાવરણ ને નુકસાન બાબતે વારંવાર રજુઆત કરવામાં આવી હતી તેથી જીપીસીપી દ્વારા કડક કાર્યવાહી કરાઈ
રસ્તા કિનારે દુર્ગંધયુક્ત ગંદા પાણીના નિકાલ અને ખુલ્લામાં કેમિકલયુક્ત પાણીના સંગ્રહ અંગે ગંભીર ગેરરીતિઓ સામે આવી
જંબુસર: જંબુસર તાલુકાના અણખી-મંગણાદ ગામની જમીનમાં આવેલી એક ઔદ્યોગિક સુવિધા સામે ગુજરાત પ્રદૂષણ નિયંત્રણ બોર્ડ (GPCB) દ્વારા પાણી પ્રદૂષણ મામલે કડક કાર્યવાહી કરવામાં આવી છે. GPCB દ્વારા તા. 6 ઓગસ્ટ, 2026ના રોજ પાણી (પ્રદૂષણ નિવારણ અને નિયંત્રણ) અધિનિયમ, 1974ની કલમ 33-A હેઠળ નિર્દેશો જારી કરવામાં આવ્યા છે.
GPCBના દસ્તાવેજ મુજબ તા. 22 જુલાઈ, 2026ના રોજ અધિકૃત અધિકારીઓ દ્વારા ઉદ્યોગનું નિરીક્ષણ કરવામાં આવ્યું હતું. નિરીક્ષણ દરમિયાન યુનિટના અંકુશ કામગીરીમાં હોવા છતાં વેસ્ટવોટર સંબંધિત અનેક ગંભીર ગેરરીતિઓ જોવા મળી હતી.
નિરીક્ષણ દરમિયાન અણખી-જંબુસર હાઈવે સાથે જોડાતા કાચા રસ્તા પર વિવિધ સ્થળોએ રંગીન અને દુર્ગંધયુક્ત ગંદા પાણીના નાના ખાબોચિયા જોવા મળ્યા હતા. આ ઉપરાંત રસ્તાની બાજુમાં પણ ગંદા પાણીના સંગ્રહ જોવા મળ્યા હોવાનું GPCBના દસ્તાવેજમાં નોંધાયું છે.
રિપોર્ટમાં વધુમાં જણાવાયું છે કે જોખમી કચરો લઈ જતાં વાહનોમાંથી લીકેજ થવાના કારણે ગંદા પાણીનો સંગ્રહ થતો હોવાની સ્થિતિ જોવા મળી હતી. નિરીક્ષણ દરમિયાન ટેન્કર પર લગાવવામાં આવેલા મોબાઇલ પંપ દ્વારા રસ્તા અને રસ્તાની બાજુમાં ગંદુ પાણી બહાર કાઢવામાં આવતું હોવાનું પણ નોંધાયું છે.
1,000 લીટર ગંદું પાણી બહાર કાઢીને ખુલ્લામાં સંગ્રહનો આક્ષેપ
GPCBના નિરીક્ષણ મુજબ આશરે 1,000 લીટર દુષિત પાણી બહાર કાઢીને 200 લીટરના ડ્રમ, બેરલ અથવા કન્ટેનરમાં સંગ્રહ કરવામાં આવતું હતું. આ ઉપરાંત વરસાદી ઋતુ દરમિયાન દુષિત પાણી આસપાસની જમીનમાં ફેલાતું હોવાની સ્થિતિ પણ રિપોર્ટમાં નોંધાઈ છે.
યુનિટ પાસે દુષિત ગંદા પાણીના સંગ્રહ માટે કુલ 9 અલગ પોન્ડ હોવાનું તથા તેમાં નોંધપાત્ર પ્રમાણમાં પાણી સંગ્રહિત હોવાનું GPCBના નિરીક્ષણમાં સામે આવ્યું છે. વેસ્ટવોટર કલેકશન પોન્ડ તરફ પાણી લઈ જવા માટે પંપ, માટીના બંધ અને એક્સકેવેટરથી કામગીરી થતી હોવાનું પણ નોંધાયું છે.
રસ્તા અને આસપાસના વિસ્તારમાં પણ પ્રદૂષણની અસર
નિરીક્ષણ દરમિયાન યુનિટની આસપાસના રસ્તા, આંતરિક રસ્તાઓ તથા અન્ય સ્થળોએ દુષિત ગંદા પાણીના નાના ખાબોચિયા મળી આવ્યા હતા. રિપોર્ટમાં નજીકના ખેતરો તથા રસ્તા પાસે પણ દુષિત પાણીના સંગ્રહનો ઉલ્લેખ કરવામાં આવ્યો છે.
GPCBએ પાણીના નમૂનાઓનું વિશ્લેષણ કરાવ્યું હોવાનું પણ દસ્તાવેજમાં દર્શાવાયું છે અને વિવિધ સ્થળેથી લેવામાં આવેલા નમૂનાઓમાં પ્રદૂષણ સંબંધિત પરિમાણો નોંધાયા હોવાનું જણાવાયું છે.
તાત્કાલિક સુધારાત્મક પગલાં લેવા આદેશ
GPCB દ્વારા જારી કરાયેલા નિર્દેશોમાં દુષિત પાણી, લીચેટ અથવા વરસાદી પાણી પરિસરની બહાર છોડવા કે ઓવરફ્લો થવા દેવા પર રોક લગાવવા જણાવાયું છે. રસ્તા તથા પરિસરમાં એકઠા થયેલા દુષિત ગંદા પાણીના નિકાલ માટે યોગ્ય વ્યવસ્થા કરવા, વાહનોમાંથી લીકેજ અટકાવવા તથા તમામ ગંદા પાણીની નાળીઓ અને વેસ્ટવોટર કલેકશન સિસ્ટમને કાર્યરત રાખવા સૂચના આપવામાં આવી છે.
આ ઉપરાંત દુષિત ગંદા પાણી અને લીચેટના સંગ્રહ, પમ્પિંગ, સારવારી અને નિકાલ સુધીના યોગ્ય રેકોર્ડ જાળવવા પણ નિર્દેશ કરવામાં આવ્યો છે.
₹10 લાખની બેંક ગેરંટીની જોગવાઈ
GPCBના આદેશમાં નિર્દેશોના પાલન માટે ₹10 લાખની બેંક ગેરંટી રજૂ કરવાની જોગવાઈ કરવામાં આવી હોવાનું દસ્તાવેજમાં જણાવાયું છે. નિર્દેશોનું પાલન નહીં થાય તો સંબંધિત કાયદાકીય જોગવાઈઓ હેઠળ કાર્યવાહી કરવાની ચેતવણી પણ આપવામાં આવી છે.
આ સમગ્ર કાર્યવાહીથી જંબુસર-આમોદ વિસ્તારના ઔદ્યોગિક પ્રદૂષણ મુદ્દે તંત્રની નજર વધુ કડક બની હોવાનું જણાઈ રહ્યું છે. ખાસ કરીને હાઈવે અને ખેતરોની આસપાસ દુષિત પાણીના સંગ્રહ અંગે થયેલી નોંધને પગલે આગામી સમયમાં GPCB દ્વારા પાલન અંગે વધુ તપાસ થાય તેવી શક્યતા છે.
