જંબુસર : જંબુસર પોલીસ દ્વારા પેટ્રોલિંગ દરમિયાન દારૂના નશામાં હોવાની શંકાસ્પદ હાલતમાં એક શખ્સને ઝડપી પાડવામાં આવ્યો હોવાનો બનાવ સામે આવ્યો છે. આ અંગે પોલીસ દ્વારા પ્રોહિબિશન એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.
મળતી માહિતી મુજબ, જંબુસર પોલીસની ટીમ પેટ્રોલિંગમાં હતી તે દરમિયાન જંબુસર રેલવે સર્કલ નજીક એક ઇસમ નશાની હાલતમાં લથડિયાં ખાતો ચાલતો જોવા મળ્યો હતો. પોલીસે તેને રોકી પૂછપરછ કરતાં તેનું નામ વિષ્ણુભાઈ સ/ઓ નાનાભાઈ કાલિદાસભાઈ વસાવા, ઉંમર 28 વર્ષ, રહે. વાસી-અણખી ગામ, નવિવસાહત, તા. જંબુસર, જી. ભરૂચ હોવાનું જાણવા મળ્યું હતું.
પોલીસના જણાવ્યા મુજબ, ઇસમના મોઢામાંથી દારૂ પીધેલી તીવ્ર વાસ આવતી હતી. તે યોગ્ય રીતે ચાલી શકતો ન હતો તેમજ નશાની અસર હેઠળ હોવાનું જણાતું હતું. તેની આંખો પણ લાલ હોવાનું પોલીસ નોંધમાં જણાવાયું છે.
પોલીસે ઇસમને દારૂ પીવા અંગેનો પાસ-પરમિટ રજૂ કરવા જણાવ્યું હતું, પરંતુ તેની પાસે કોઈ પાસ કે પરમિટ ન હોવાનું જાણવા મળ્યું હતું. ત્યારબાદ પંચોની હાજરીમાં કાર્યવાહી કરી દારૂના નશામાં હોવાના આરોપસર તેની સામે ગુનો નોંધવામાં આવ્યો હતો.
આ મામલે જંબુસર પોલીસ સ્ટેશન ખાતે ફરિયાદ નોંધાઈ છે અને આગળની તપાસ હાથ ધરવામાં આવી છે. તપાસ અધિકારી તરીકે પોલીસ કર્મચારીને તપાસ સોંપવામાં આવી હોવાનું ફરિયાદની નકલમાં દર્શાવવામાં આવ્યું છે.
પોલીસની પેટ્રોલિંગ કામગીરી દરમિયાન નશાની હાલતમાં ઝડપાયેલા શખ્સ સામે કાયદેસરની કાર્યવાહી થતાં દારૂના ગેરકાયદેસર સેવન સામે પોલીસની કામગીરી ફરી એકવાર સામે આવી છે.
