કાછીયા પટેલ પંચ પોળનામાં શક્તિ નવરાત્રી મહોત્સવનો ભવ્ય પ્રારંભ, ભૂલકાંથી મોટેરાં સુધી ગરબાની રમઝટ!
લીલોતરી બજાર બન્યું ભક્તિ અને ગરબાનું આંગણું, દીપ પ્રાગટ્ય સાથે નવરાત્રી મહોત્સવનો શુભારંભ
બાળ ભુલકાંઓના ગરબાથી લઈને ત્રણ તાળીના ગરબા સુધી રંગત જામી; માતાઓ, બહેનો, યુવાનો અને વડીલોએ ઉત્સાહભેર ભાગ લીધો
જંબુસર : જંબુસરના લીલોતરી બજાર ખાતે કાછીયા પટેલ પંચ પોળ દ્વારા આયોજિત માં શક્તિ નવરાત્રી મહોત્સવનો પ્રથમ દિવસથી જ ભક્તિ, પરંપરા અને ઉત્સાહભર્યા માહોલમાં ભવ્ય પ્રારંભ થયો હતો. પરંપરાગત શેરી ગરબાની આગવી ઓળખ જાળવી રાખતા આયોજકોએ સુંદર આયોજન સાથે નવરાત્રીના પ્રથમ જ દિવસે ગરબાની રંગત જમાવી હતી.
મહોત્સવના પ્રારંભ પ્રસંગે સમાજના આગેવાનો દ્વારા દીપ પ્રાગટ્ય કરવામાં આવ્યું હતું તથા શ્રીફળ વધેરી માતાજીની આરાધના સાથે નવરાત્રી મહોત્સવનો વિધિવત્ શુભારંભ કરવામાં આવ્યો હતો. ત્યારબાદ યોજાયેલી માતાજીની આરતીમાં સમાજના આગેવાનો સહિત યુવાનો, વડીલો, માતાઓ અને બહેનોએ ભાવપૂર્વક જોડાઈ માતાજીના આશીર્વાદ મેળવ્યા હતા.
દર વર્ષની પરંપરા મુજબ સૌપ્રથમ નાના ભૂલકાંઓ માટે ગરબાનું આયોજન કરવામાં આવ્યું હતું. જેમાં મોટી સંખ્યામાં બાળકોએ ઉત્સાહભેર ભાગ લઈને ગરબાની રમઝટ બોલાવી હતી. બાળકોના ગરબા દરમિયાન દાતાઓના સહયોગથી લ્હાણીનું વિતરણ કરવામાં આવ્યું હતું, જેને લઈને બાળકોમાં પણ અનેરો ઉત્સાહ જોવા મળ્યો હતો.
ત્યારબાદ યુવાનો, વડીલો, માતાઓ અને બહેનોએ પરંપરાગત ત્રણ તાળીના ગરબામાં ઉત્સાહભેર ભાગ લીધો હતો.
ગરબાના તાલે ઝૂમતા ખેલૈયાઓ અને ભક્તિમય વાતાવરણથી લીલોતરી બજાર જીવંત બની ઊઠ્યું હતું. આ તબક્કે પણ દાતાઓ દ્વારા લ્હાણી વિતરણ કરવામાં આવ્યું હતું.
સમાજની એકતા, સંસ્કૃતિ અને પરંપરાને ઉજાગર કરતા આ મહોત્સવમાં પ્રથમ દિવસથી જ ઉત્સાહપૂર્ણ માહોલ જોવા મળ્યો હતો. સુંદર આયોજન, માતાજી પ્રત્યેની અખૂટ શ્રદ્ધા અને સમાજના લોકોની ઉત્સાહભરી ભાગીદારીએ માં શક્તિ નવરાત્રી મહોત્સવના પ્રારંભને યાદગાર બનાવ્યો હતો.
આમ, જંબુસરના લીલોતરી બજારમાં પરંપરાગત શેરી ગરબાની સંસ્કૃતિને જીવંત રાખતા કાછીયા પટેલ પંચ પોળના નવરાત્રી મહોત્સવે પ્રથમ દિવસથી જ ભક્તિ અને ગરબાની અનોખી રંગત જમાવી હતી.
