ગુજરાતમાં વર્ષોથી અમલમાં રહેલા કડક નશાબંધી કાયદા વચ્ચે રાજ્ય સરકારે ગિફ્ટ સિટી (GIFT City) માટે મહત્વનો અને દુરગામી નિર્ણય લીધો છે. સરકાર દ્વારા દારૂના નિયમોમાં વધુ છૂટછાટ આપવામાં આવી છે, જેનો મુખ્ય હેતુ ગિફ્ટ સિટીને એક આંતરરાષ્ટ્રીય નાણાકીય અને વ્યાવસાયિક હબ તરીકે વિકસાવવાનો છે.
નવા નિયમો શું કહે છે?
20 ડિસેમ્બરે ગૃહ વિભાગ દ્વારા જાહેર કરાયેલા નવા જાહેરનામા મુજબ હવે ગિફ્ટ સિટીમાં દારૂ પીવા માટે દરેક વ્યક્તિએ ફરજિયાત પરમિટ લેવાની જરૂર નથી.
ગુજરાતના રહેવાસી ન હોય તેવા લોકો, અન્ય રાજ્યોના નાગરિકો તેમજ વિદેશી નાગરિકો હવે માત્ર માન્ય ફોટો ઓળખપત્ર દર્શાવીને ગિફ્ટ સિટીમાં નિર્ધારિત સ્થળોએ દારૂ પી શકે છે. અગાઉ તેમને કામચલાઉ પરમિટ લેવી પડતી હતી, જે પ્રક્રિયા લાંબી અને સમયખોર હતી.
2023થી શરૂ થયેલી છૂટ હવે વધુ વિસ્તૃત
વર્ષ 2023માં પ્રથમ વખત ગિફ્ટ સિટીમાં પરમિટ સિસ્ટમ હેઠળ દારૂ સેવનની મંજૂરી આપવામાં આવી હતી. હવે સરકારે નિયમોને વધુ સરળ બનાવીને વિદેશી રોકાણકારો, ઉદ્યોગપતિઓ અને મલ્ટીનેશનલ કંપનીઓના અધિકારીઓ માટે અનુકૂળ માહોલ ઊભો કર્યો છે.
હવે ક્યાં-ક્યાં દારૂ પીરસી શકાશે?
નવા નિયમો મુજબ હવે દારૂ ફક્ત રેસ્ટોરાં પૂરતું મર્યાદિત નહીં રહે.
હોટલના પરિસરમાં, લોન અને ખુલ્લી જગ્યાઓમાં, પૂલ સાઈડ, ટેરેસ તેમજ ફૂડ અને બેવરેજ ઝોનમાં પણ દારૂ પીરસી શકાશે. આ ફેરફાર ગિફ્ટ સિટીને વૈશ્વિક બિઝનેસ સેન્ટર જેવી સુવિધાઓ તરફ લઈ જાય છે.
ગિફ્ટ સિટીના કર્મચારીઓને પણ રાહત
ગિફ્ટ સિટીમાં કાર્યરત કર્મચારીઓ માટે પણ પરમિટ પ્રક્રિયા સરળ બનાવાઈ છે. અગાઉ HR વડા અથવા ભલામણ અધિકારી મારફતે અરજી કરવાની ફરજ હતી, જ્યારે હવે કર્મચારી સીધા અધિકૃત વ્યક્તિ દ્વારા પરમિટ માટે અરજી કરી શકશે. ચકાસણી બાદ અરજી નશાબંધી અને આબકારી વિભાગને મોકલવામાં આવશે.
પરમિટ ધારકોને વધારાની સુવિધાઓ
પરમિટ ધરાવનાર વ્યક્તિ હવે એક સાથે 25 મહેમાનોને આમંત્રિત કરી શકે છે, મહેમાનો સાથે રેસ્ટોરાં અથવા નિર્ધારિત વિસ્તારોમાં જઈ શકે છે, તેમજ ફક્ત ભોજન માટે આવનાર લોકોને પણ વાઇન અને ડાઇન ઝોનમાં પ્રવેશ મળશે.
સરકારનો હેતુ શું છે?
નિષ્ણાતોનું માનવું છે કે ગુજરાત પ્રોહિબિશન એક્ટ, 1949 હેઠળ આપવામાં આવેલી આ છૂટનો હેતુ ગિફ્ટ સિટીને વૈશ્વિક નાણાકીય કેન્દ્ર બનાવવાનો, વિદેશી રોકાણકારોને આકર્ષવાનો અને આંતરરાષ્ટ્રીય ફાઇનાન્સિયલ સિટીઓ સાથે સ્પર્ધા કરી શકાય તેવો માહોલ ઊભો કરવાનો છે. સરકાર માને છે કે વ્યવસાયિક અનુકૂળતા વધવાથી રોકાણ અને વિકાસને નવી ગતિ મળશે.