ઇસ્લામાબાદની હોસ્પિટલમાં ભીષણ આગ: અનેક નવજાતનાં મોત, એક બાળકનું રેસ્ક્યૂ

PIMSની નર્સરીમાં સવારે આગ ફાટી નીકળી; AC સિસ્ટમમાં ખામી હોવાની પ્રાથમિક માહિતી, ઘટનાની તપાસ શરૂ

ઇસ્લામાબાદ: પાકિસ્તાનની રાજધાની ઇસ્લામાબાદમાં બુધવારે સવારે બનેલી ભયાનક આગની ઘટનાએ સમગ્ર દેશને હચમચાવી દીધો છે. Pakistan Institute of Medical Sciences (PIMS)ની ગાયનેકોલોજી અને માતા-બાળક વિભાગની નર્સરીમાં આગ લાગતાં અનેક નવજાત શિશુઓએ જીવ ગુમાવ્યો છે. શરૂઆતના અહેવાલોમાં મૃત્યુઆંક 15 સુધી પહોંચ્યો હોવાનું જણાવાયું છે, જ્યારે ઇસ્લામાબાદ વહીવટીતંત્રના એક અપડેટમાં 14 નવજાતના મોતની માહિતી આપવામાં આવી હતી.

નર્સરીમાં 16 નવજાત હોવાની માહિતી

ઘટના સમયે નર્સરીમાં 16 નવજાત શિશુઓ હોવાની માહિતી સામે આવી છે. બચાવ કામગીરી દરમિયાન માત્ર એક બાળકને સુરક્ષિત બહાર કાઢવામાં આવ્યું હોવાનું અહેવાલોમાં જણાવાયું છે.

પ્રાથમિક માહિતી અનુસાર આગ સવારે આશરે 7 વાગ્યાની આસપાસ હોસ્પિટલના ગાયનેકોલોજી વિભાગમાં ફાટી નીકળી હતી. આગ ઝડપથી ફેલાતા નર્સરીમાં ધુમાડો ભરાઈ ગયો હતો અને બચાવ કામગીરી પડકારજનક બની હતી.

AC સિસ્ટમમાં ખામીથી આગ લાગી હોવાની આશંકા

બચાવ સૂત્રો અનુસાર નર્સરીમાં રહેલી એર-કન્ડિશનિંગ સિસ્ટમના કોમ્પ્રેસરમાં વિસ્ફોટ બાદ આગ લાગી હોવાની પ્રાથમિક માહિતી સામે આવી છે. જોકે, આગનું ચોક્કસ કારણ સત્તાવાર તપાસ બાદ જ સ્પષ્ટ થશે. કેટલાક પ્રાથમિક અહેવાલોમાં શોર્ટ સર્કિટની શક્યતાનો પણ ઉલ્લેખ કરવામાં આવ્યો હતો.

ફાયર ટીમ અને એમ્બ્યુલન્સે સંભાળી મોરચો

ઘટનાની જાણ થતાં જ ફાયર બ્રિગેડ અને બચાવ ટીમો તાત્કાલિક હોસ્પિટલ પહોંચી હતી. ઇસ્લામાબાદ વહીવટીતંત્રના જણાવ્યા મુજબ છ ફાયર બ્રિગેડ વાહનો અને ચાર એમ્બ્યુલન્સ બચાવ કામગીરીમાં જોડાયા હતા. આગને કાબૂમાં લીધા બાદ અસરગ્રસ્ત વિસ્તારમાં કૂલિંગ કામગીરી પણ હાથ ધરવામાં આવી હતી.

તપાસ માટે સમિતિની રચના

આ ગંભીર દુર્ઘટનાના કારણો જાણવા માટે તપાસના આદેશ આપવામાં આવ્યા છે. પાકિસ્તાનના વડાપ્રધાન શહબાઝ શરીફે પણ ઘટનાને લઈને તાત્કાલિક તપાસ અને જવાબદારી નક્કી કરવા સૂચના આપી હોવાનું પાકિસ્મીતાની મીડિયાએ અહેવાલ આપ્યો છે.

હાલ આગ પર કાબૂ મેળવી લેવામાં આવ્યો છે અને ઘટનાસ્થળે તપાસની કાર્યવાહી ચાલી રહી છે.

PIMS ઇસ્લામાબાદની મહત્વપૂર્ણ સરકારી હોસ્પિટલ

PIMS ઇસ્લામાબાદની સૌથી મોટી સરકારી હોસ્પિટલોમાંની એક છે અને શહેરના મોટી સંખ્યામાં દર્દીઓને આરોગ્યસેવા પૂરી પાડે છે. નર્સરીમાં બનેલી આ દુર્ઘટનાએ હોસ્પિટલોમાં આગ સામેની સુરક્ષા વ્યવસ્થા અને ઇમરજન્સી રિસ્પોન્સ અંગે પણ ગંભીર સવાલો ઊભા કર્યા છે.

નોંધ: ઘટના હજુ તપાસ હેઠળ છે અને મૃત્યુઆંક અંગે વિવિધ તબક્કે અલગ-અલગ આંકડા સામે આવ્યા છે. સત્તાવાર અંતિમ આંકડો તપાસ અને ઓળખ પ્રક્રિયા બાદ સ્પષ્ટ થઈ શકે છે.